Mörg okkar eyðum miklum tíma og peningum í að viðhalda fallegum augabrúnum.

Þær eru plokkaðar, vaxaðar og mótaðar eftir okkar smekk. Flest okkar vita samt ekki hvers vegna við erum með þessar sveignu boga af hári á enninu.

Hvaða tilgangi þjóna augabrúnirnar okkur?

Þið getið hætt að reyna að finna það út, því hérna eru skemmtilegar staðreyndir um augabrúnir. Þú átt eftir að hugsa um þínar á annan hátt en áður eftir þessa lesningu.

– Þær eru hannaðar til þess að  hjálpa okkur að sjá.

Það sem augabrúnir gera (fyrir utan að láta okkur líta fabulous vel út) er að þær halda raka frá augunum þegar það er rigning eða þegar við svitnum. Þær eru bogadregnar til þess að vökvinn renni niður sitt hvoru megin við hvort auga.

– Það eru ótrúlega mörg hár í hverri brún.

Á venjulegri manneskju eru um 250 hár á hvorri augabrún. En þau geta verið fleiri og jafnvel eins mörg og 1.100 stk á hvorri brún. Það eru loðnar augabrúnir!

-Augabrúnir hafa lífstíma.

Lífstími augabrúna er um fjórir mánuðir. Það þýðir að …. lesa áfram

Fæst okkar vilja kannast við að hafa lagt mat á hæfni foreldra; getu mæðra til að annast eigin börn. Öll höfum við þó einhverju sinni gotið illu auga að örvæntingarfullu foreldri, sem reynir af alefli að sefa grátandi barn sitt á yfirfullum veitingastað, um borð í flugvél eða jafnvel á götu úti.

Í auglýsingunni hér að neðan, sem að vísu er amerísk og tekur mið af aðstæðum þar í landi, er farið ofan í saumana á þeim vanmætti sem mæður nýfæddra barna upplifa oft þegar upp fyrir þeim rennur að lífið getur verið óútreiknanlegt, að aðstæður geta verið alla vega og að enginn getur brugðist við af fullum heilindum og óskiptri yfirvegun í fjölbreytilegustu aðstæðum.

Þó fyllilega mannlegt sé að renna auga til næsta manns, bera saman eigin aðstæður og annarra og jafnvel upplifa ákveðna yfirburðatilfinningu eitt andartak – er hvorki heilbrigt né uppbyggilegt að meta og mæla út stöðugt hversu vel eða illa öðrum tekst til.

Því er auglýsingin hér þróttmikil áminning um þá staðreynd, hversu erfitt nýbökuðum foreldrum þykir að vera undir stöðugri smásjá hins árvökula vegfaranda og hversu mikilvæg samstaðan er í lífi mæðra.

Falleg hugvekja sem þjónar sem þörf áminning þess að hafa kærleikann í fyrirrúmi:

Orðrómurinn um endurfundi þeirra Mulder og Scully, sem lengi hefur verið á sveimi, hefur loks fengist staðfestur. X-Files snúa brátt aftur en tökur hafa staðið yfir á framhaldsþáttaröð sem fylgir þessu skarpskyggna rannsóknarteymi í humátt eftir og fylgist grannt með viðskiptum þeirra við framandi öfl.

Ný kynningarstikla, sem er yfir 20 mínútna löng, fór svo í loftið nú í gær sem sýnir frá tökum þáttana sjálfra, sem verða frumsýndir snemma á næsta ári og einnig viðhorfum aðalleikarana til endurkomunnar.

Þannig má meðal annars hlýða á Gillian Anderson, sem fer með hlutverk Scully, ræða allt frá opnunarstefinu sjálfu til söguþráðarins, en hún segist himinlifandi yfir því að taka upp þráðinn þar sem frá var horfið, en fyrsti þátturinn um X-Files var frumsýndur vetanhafs þann 10 september 1993 og er því magnað að báðir aðalleikarar skuli enn ekki einungis í fullu fjöri, heldur reiðubúin til að enduropna leynimöppurnar.

Á vef IMDB má fylgjast með uppfærslum af nýju þáttaröðinni, sem fer eins og hér greinir frá, í loftið á næsta ári, en hér má hins vegar sjá og hlýða á æsispennandi 20 mínútna langa stiklu þar sem farið er ofan í saumana á gerð X-Files:

Kyntáknið og söngstjarnan Mark Salling, sem garðinn gerði frægan sem uppreisnarseggurinn Puckerman í metsöluþáttunum GLEE hér um árið, var handtekinn á heimili sínu í Sunland, Kaliforníu fyrr í dag og færður í gæsluvarðhald.

Kynferðisbrotadeild lögreglunnar í Los Angeles réðist til atlögu og gerði húsleit hjá Salling í kjölfar ábendingar sem barst frá fyrrum unnustu leikarans, en hún hafði samband við lögreglu fyrir nokkrum dögum síðan og sagði hundruðir klámfenginna ljósmynda af ólögráða börnum á fartölvu hans.

Handtakan var svo framkvæmd í kjölfar húsleitar, þegar kynferðisbrotadeild hafði komið höndum yfir og yfirfarið sjálft safnið, en áður hafði verið gengið úr skugga um að ekki væri um hefndaraðgerðir eða óvæginn áburð að ræða. Enginn vafi mun leika á því að leikarinn hlóð sjálfur niður ljósmyndunum, en þó ekki hafi verið greint frá eðli myndefnis eða aldri fórnarlambanna er augljóst að um alvarlegt brot er að ræða, þar sem leikarinn hefur nú verið hnepptur í gæsluvarðhald.

Þetta er ekki í fyrsta sinn sem Salling er ákærður fyrir kynferðisbrot, en ung stúlka lagði fram ákæru á hendur honum fyrir þvingað samræði án verju árið 2013. Málinu lauk með réttarsátt í það skiptið og reiddi Salling fram 2.7 milljónir Bandaríkjadala – eða um 350 milljónum íslenskra króna, til að ljúka málinu.

Crime Watch Daily greindi frá

Þegar laufin tók að falla af trjánum nú í haust og fyrstu snjókornin féllu í vetur, tókum fram hlýju fötin okkar og leituðum huggunar í mat og drykk. Ljúffengar súpur og heitt súkkulaði. Enginn var að telja hitaeiningar. Svo leið að þakkagjörðarhátíðinni, jólaglögginu, jólahlaðborðunum, jólunum, áramótunum, árshátíðunum og við gleymdum öllum fyrirætlunum um að borða hollt og aukakílóin kíktu eitt af öðru í heimsókn. Og þar sem það er vetur þá er auðvelt að fela þau undir stórum kápum, víðum peysum, úlpu og stórum treflum. Við erum töff, fylgjum tískunni og þægindin ráða ferðinni. En þurfum við á þessari aukabyrði að halda?

Það er mjög mikilvægt að vera með plan um hvernig maður heldur sér í formi á veturna, alveg eins og þegar vora tekur og við eru léttklæddari.

Hér koma nokkur ráð sem auðvelt er að tileinka sér:

1. Vökvaðu þig
Vatn er mjög mikilvægt allt árið um kring. Vertu alltaf með vatnsflösku við höndina og drekktu nóg af vatni. Það kemur ekkert í staðinn fyrir vatnið svo þú getur ekki drukkið kaffi eða te í staðinn. Það er viðbót við vatnið. Það er tilvalið að byrja daginn á volgu sítrónuvatni sem kemur þér í gang, örvar meltinguna, gefur þér orku og eykur brennsluna. Og ekki er verra að tileinka sér morgun sítrónuhreinsun.

2. Hafðu stjórn á kolvetnaneyslunni
Þú þarft ekki að hætta að neyta kolvetna en að borða kolvetni í hverri máltíð á hverjum degi er alls ekki góð hugmynd. Minnkaðu kolvetnaneyslu og vertu vandlát á hvers konar kolvetni þú lætur ofan í þig. Í stað þess að borða hvítt brauð, borðaðu þá hrökkbrauð. Slepptu hvítu pasta og fáðu þér spelt eða heilhveiti í staðinn.

3. Verðlaunaðu þig skynsamlega
Kex, kökur og sælgæti er eitthvað sem fylgir þessari árstíð og þú gætir átt góðar minningar um góðu smákökurnar hennar mömmu og súkkulaði drykkinn sem þú fékkst alltaf hjá Gunnu frænku, en farðu varlega þarna. En það þýðir ekki að þú þurfir að neita þér um allt og naga bara gulrót. Lærðu að verðlauna þig skynsamlega og minnkaðu skammtana. Smakk er oft alveg jafn fullnægjandi og fullur diskur.

4. Keyptu þér kort í ræktina
Þetta er ein best fjárfestingin á veturna. Það er erfiðara að drífa sig út að hlaupa eða synda þegar hitastigið fellur. Farðu með vinkonu í ræktina og finndu eitthvað þar sem þér finnst skemmtilegt. Passaðu að hreyfa þig allavega þrisvar sinnum í viku. Ef þú hefur plássið og sjálfsagann þá getur þú líka gert þetta heima hjá þér. Þessar æfingar eru frábærar til að móta líkamann og missa aukakíló

5. Keyptu nóg af ávöxtum og grænmeti
Tilvalið að styrkja ónæmiskerfið og fá meiri orku yfir vetrarmánuðina. Flest grænmeti og ávextir er hollur valkostur. Með því að borða meira af ávöxtum og grænmeti yfir vetrarmánuðina þá styrkir þú ónæmiskerfið, eykur orkuna, bætir heilsuna og forðast aukakílóin með því að velja hollari valkost.

6. Taktu ábyrgð
Þú ert sú eina sem getur fengið þig til að æfa og fylgja hollri mataráætlun. Ekki treysta á maka þinn, vinkonu, foreldra þína eða aðra. Skynsamlegast er að borða allt en í minni skömmtum og leyfa sér sjaldnar óhollustu. Að borða mjög lítinn skammt eða smakka á uppáhalds kökunni þinni gerir þig ekki feita. Notaðu skynsemina og taktu ábyrgð.

Þegar myrkrið og veturinn skellur á okkur þá leitum við oft í mat til að láta okkur líða betur en það virkar ekki þannig. Hlustaðu á líkama þinn og gefðu honum næringarefni sem hann þarfnast en ekki bara hitaeiningar.

Heimild: www.womenshealth.com

Talandi um jóla- og áramótaglaðnng tónlistarunnandans! The Weeknd gaf orðalaust út tvær smáskífur seint á jólakvöld gegnum Soundcloud og netið iðar af melódíum!

Á fyrra laginu má heyra The Weeknd í samvinnu við Future flytja lag sem ber heitið Low Life, en listamaðurinn lét ekki þar við sitja heldur kastaði einnig remix af Pass Dat í loftið, þar sem hlýða má á rapparann Jeremih í félagi við þann fyrrnefnda.

Beint á brennslulistann í ræktina og jafnvel í áramótapartýið!  

Ógeðfelldar fregnir af barnaklámi því er lögreglan gerði upptækt snemma í gærdag á hörðum disk söngleikjastjörnunnar Mark Salling halda áfram að berast úr henni gömlu Hollywood.

Salling, sem fyrst sló í gegn sem Puckerman, í unglingasmellinum GLEE var í gær handtekinn og hnepptur í gæsluvarðhald, eins og SYKUR greindi frá, en kyntáknið reiddi fram 20.000 Bandaríkjadali í tryggingu og var látinn laus síðdegis þann sama dag.

Húsleit kynferðisbrotadeildar lögreglunnar í L.A. leiddi í ljós að Salling, sem orðinn er 33 ára gamall, hafði yfir að ráða þúsundum ljósmynda af ólögráða börnum í kynferðislegum athöfnum á hörðum disk fartölvu sinnar. Er nú komið í ljós að sumar ljósmyndanna sýndu berlegt kynferðislegt ofbeldi gegn stúlkum yngri en 10 ára gömlum og hefur málið vakið mikinn óhug vestanhafs.

Enn á lögreglan eftir að yfirfara spjaldtölvu, aðra fartölvu og farsíma leikarans ástæla og er búist við að enn meiri viðbjóður muni líta dagsins ljós á næstu dögum. Um skelfilegt mál er að ræða, en það var fyrrum unnusta leikarans sem kom kynferðisbrotadeild á sporið og greindi fyrst manna frá skelfilegu eðli ljósmyndanna.

Salling fór með eitt aðalhlutverka í unglingasöngleiknum GLEE í fyrstu fjóru þáttaröðunum og var reglulegur gestaleikari allt þar til söngleikjaserían leið undir lok, en hann gerði síðar garðinn frægan sem kristilegur söngvari og var að vinna að eigin sjónvarpsþáttaröð þar til handtökuna bar að. Fall Salling er því talsvert og eins og Washington Post skýrir frá hafa fáar stjörnur risið upp að nýju eftir svo alvarlega atvikaröð sem Salling stendur nú frammi fyrir, jafnvel þó engin ákæra hafi verið gefin út á hendur unglingastirninu enn sem komið er.

Hér má hlýða á Salling flytja slagarann Just My Imagination í Hvíta Húsinu árið 2011: 

TMZ greindi frá

Selena Gomez er nær ójarðlega heit í nýútkomnu myndbandi við smáskífuna Hands To Myself, þar sem hún brýst inn á heimili kyntákns og hreiðrar nær nakin um sig í svefnherberginu þar sem stjarnan sleppir ímyndunaraflinu lausu og erótíkinni um leið.

Myndbandið hefur vakið talsverða athygli og ekki að ósekju, flestir vilja vita hver stóðfolinn sem fer með stórt hlutverk á móti Selenu er, en hann mun heita Christopher Mason og er karlfyrirsæta. Hér er Instagram reikningur folans, ef einhverjir vilja grennslast fremur fyrir um ágæti karlfolans sem kallar til lögreglu vegna ástleitinna tilburða kynsoltinnar Selenu í myndbandinu hér að neðan. 

Augljóst er að Bieber mátti sjá á eftir glæstri konu þegar sambandi þeirra Selenu lauk, en gullbarkinn hefur meðal annars látlaust deilt ljósmyndum af parinu meðan allt lék í lyndi, undanfarnar vikur – en allt kemur fyrir ekki. Selena hefur þegar lagt samband þeirra að baki og er orðin að glæstri, ungri konu sem hefur lagt heiminn að fótum sér.

Sjóðheitur smellur frá Selenu sem hefur rokið upp vinsældarlista Billboard:

Hérna eru nokkur ráð til þess að bæta og efla sköpunargleðina og kraftinn til að skapa og gera. Þessi ráð eru m.a. úr grein úr Scientific American Mind sem var skrifuð af: Evangelia G. Chrysikou. Það sem er áhugavert við þessi ráð sem bæta og efla hjá okkur sköpunargleðina er að þau bæta öll þitt geð og efla þína sátt í lífinu.

Spurningin er af hverju það virðist vera svona öflug tenging á milli sköpunarkraftsins og vellíðan. Það er líklega vegna þess að sköpunarkrafturinn er eitt af grundvallaratriðum í okkar sátt. Ef við stefnum að því að bæta efla og styrkja sköpunargleðina að þá stefnum við um leið að öllu því sem skiptir máli í sátt og vellíðan.

Eftirtekt. Takið eftir umhverfinu og skoðið hvernig hlutir eru notaðir til að leysa vandamál og verkefni dagsins.

Vertu sérfræðingur. Yfirsýn og samhengið verður betra hjá þér eftir því sem þekking þín og reynsla er meiri. Eftir því sem þú hefur betri yfirsýn gætir þú mögulega fundið nýjar lausnir auðveldar.

Þekktu þinn markhóp. Reyndu á þínu eigin skinni hvað þú sjálfur ætlar þínum markhóp að ganga í gegnum.

Farðu út úr þægindarýminu. Reyndu eitthvað nýtt, sem byggir ekki endilega á þinni sérhæfni. Gerðu eitthvað sem væri áhugavert fyrir þig sjálfan eða þína mögulega notendur.

Prófaðu fyrst alein/n og leggðu áherslu á þína eigin vinnu. Hópavinna er miklu öflugari ef fólk kemur undirbúið með sína heimavinnu og hefur prófað sjálft áður á eigin spýtur.

Ræddu við aðra í faginu. Að fá nýja og utanaðkomandi skoðun getur hjálpað þér að byggja upp samræmt álit á verkefninu og hjálpað þér að sjá og tálga til aðra möguleika.

Hafðu af þessu gaman. Gott skap getur brætt saman nýjar tengingar. Notaðu til dæmis tónlist til þess að hjálpa upp á skapið og fá fram sköpunargleðina og kraftinn í verkið.

Prófaðu að hvíla þig og leyfa huganum að reika. Svefn og dagdraumar getur bætt ímyndunaraflið og alið frá sér hugmyndir sem þú ert að vonast eftir.

Taktu hvíld frá verkinu. Farðu eitthvað annað og gerðu eitthvað nýtt. Komdu svo endurbættur og úthvíldur að verkinu og athugaðu hvort þú fáir ekki ferska sýn á málin.

Prófaðu nýjar áherslur. Prófaðu nýja leið í vinnuna, eða nýjar venjur yfir daginn. Gefðu algerlega upp hina upprunalegu hugmynd og skoðaðu algerlega ferska möguleika.

Fáðu lánað svör úr öðrum sérfræðisviðum og skoðaðu hvort það sé ekki nýtt samhengi í málinu.

Það er líka grein á kulnun.is sem fjallar um svefnvandamál og þar eru mörg ráðin mjög á eina leið eins og hér.
Hafðu þína sýn á lausninni alltaf til hliðsjónar. Horfðu í mögulega sátt í málinu og mögulega hvernig þú vilt sjá málin í framtíðinni. Það er sterkt afl til allra verka.

Gróska í lestri, verulega skemmtileg og fjörug samskipti ritstjórnar við lesendur og reglubundnar hláturskviður einkenndu árið sem er að líða á vef SYKUR. Ritstjórn lítur þannig yfir farinn veg með hlýju og þakklæti í huga þegar talið berst að undangengnum mánuðum, en enginn vafi leikur á því að árið 2016 muni verða enn líflegra, ef marka má þann snarpa vaxtarkipps sem orðið hefur á lesendahóp SYKUR.

Eins og verða vill um tímamót sem þessi, er skemmtilegt að líta yfir farinn veg og rifja upp hvaða greinar vöktu mesta athygli á árinu sem rennur sitt skeið á morgun, síðasta dag ársins.

Hér fara þær, tíu mest lesnu greinar SYKUR árið 2015 í öfugri röð en þetta vakti mestan áhuga lesenda:

#10 – 7 HÚSRÁÐ: EKKI HENDA KÍSILKÚLUNUM!

Hollráð Kollu Kvaran hafa í einu orði sagt slegið í gegn á vef SYKUR og er óhætt að segja að öll húsráð Frú Kvaran, sem er búsett mitt í litlum í ævintýraskógi í Noregi – ásamt börnum, eiginmanni og gæludýrum, hafi yljað lesendum og gælt við húsmóðurgenin. Skemmtilegt sem það nú er, hlaut umfjöllun Kollu sem bar nafnið: „7 Húsráð: Ekki henda kísilkúlunum!” talsvert mikla umfjöllun og trónir í tíunda sæti listans. 

#9 – HVERNIG ORÐAR ÞÚ HLUTINA? PERSÓNULEIKAPRÓF!

Orð eru til alls likleg. Þetta skilja lesendur SYKUR, sem flestir þreyttu próf sem sýnir svart á hvítu að ekki er alltaf sama hvernig hlutirnir eru orðaðir. Slangrið og orðaskipan setninga getur varpað glettilegu ljósi á hvaða persónu við höfum að geyma; ritstjóri SYKUR er þannig óforbetranleg ævintýramanneskja, eins og prófið afhjúpaði og þá er einungis þeirri spurningu ósvarað hvaða manneskju þú, kæri lesandi, hefur að geyma …

#8 – EINSTÆÐ MÓÐIR MEÐ FJÖGUR BÖRN HEFUR EKKI EFNI Á MATVÆLUM – FYLGSTU MEÐ MANNINUM FYRIR AFTAN HANA: 

Náungakærleikurinn og samvitund einkenndi árið sem var að líða og þannig vakti umfjöllun SYKUR um bága stöðu einstæða móður sem ekki gat greitt fyrir matvælin þegar á kassann var komið, talsverða athygli. Lesendur tóku undir með miskunnsama Samverjanum og lífleg umræða skapaðist um þá nauðsyn að rétta fram hjálparhönd. 

#7 – GLEYMDIRÐU AÐ BORÐA MORGUNMAT? LESTU ÞETTA ÞÁ! 

Dásamlegur morgunverður sem framreiða má í upphafi hverrar viku vakti stormandi lukku á vef SYKUR; ljúffengur hafragrautur sem setja má í ílát og geyma fram í miðja eða jafnvel lok vinnuviku. Ritstjórn fór ekki varhuga af kræsingunum; stúlkurnar sem halda úti SYKUR skera jafnvel niður ferska ávexti í upphafi hvers dags og nýta sér enn uppskriftina sem sló í gegn á vefnum – með örlítilli viðbót af grískri jógúrt.

#6 – HVAÐA DYR VELUR ÞÚ? VALIÐ SEGIR ÓTRÚLEGA MARGT UM ÞIG! 

Hvaða dyr valdir þú? Persónuleikaprófið fór sigurför um netið, enda niðurstöður skemmtilegar í meira lagi. Lesendur voru ófeimnir við að deila niðurstöðum og miklar sem líflegar umræður fylgdu í kjölfarið. Að því sögðu er einungis einni spurningu ósvarað; ert þú búin/n að taka prófið og hver var niðurstaðan?

#5 – 7 ÆFINGAR SEM MUNU UMBREYTA LÍKAMA ÞÍNUM

Önnum kafnir lesendur SYKUR gripu þetta þægilega heimaæfingakerfi á lofti og hömpuðu óspart, enda dýrt að kaupa kort í ræktina og stundum gefst einfaldlega enginn tími til að grípa æfingatöskuna og bruna af stað í næsta æfingasal. Þessar sjö léttu æfingar virka svo sannarlega sem skildi, að því sögðu að kerfinu sé fylgt daglega eftir og það á stofugólfinu heima – einfaldara gæti það ekki verið!

#4 – GERÐU ÞETTA Á HVERJUM DEGI OG AUKAKÍLÓIN HVERFA

Flestir vildu í sundbolinn koma þegar sól tók að hækka á himni í vor og þannig vakti heimalöguð uppskrift að afeitrandi drykk, sem eykur á saðsemistilfinningu talsverða athygli síðastliðið vor. Ritstjórn beið ekki boðanna og blandaði undradrykkinn, sem kom að góðum notum á sendnum strendum í sólarlöndum nú í sumar og uppskar erindi sem erfiði – enda tóku kílóin að fljúga þegar drykkjarkannan góða var komin í kæli. 

#3 – KYNLÍF OG STJÖRNUMERKI: HELSTU EINKENNI STJÖRNUMERKJA Í KYNLÍFINU

Hvaða stjörnumerki skyldi vera best í bólinu? Er það nautnafulli Sporðdrekinn, óútreiknanlegi Bogmaðurinn eða nákvæma Meyjan? Þessum spurningum þyrsti lesendur að finna svör við á árinu sem er að líða og sló umfjöllun um eðli og hegðan stjörnumerkjanna í svefnherberginu algerlega í gegn. Ef þú hefur gaman af að pæla í stjörnumerkjum þá er þessi grein fyrir þig; klassísk og stórskemmtileg.

#2 – SIR ANTHONY HOPKINS STEINÞAGÐI YFIR STÆRSTA LEYNDARMÁLI SÍNU Í RÚM FIMMTÍU ÁR!

Áður en Anthony Hopkins fetaði sín fyrstu spor á leiklistarbrautinni hafði hann aðra atvinnu, sem hann hefur aldrei minnst á. Reyndar fór hann svo vel með leyndarmálið að hann ræddi það varla við nokkurn mann í heil fimmtíu ár. Sumt er þess eðlis að orð ná ekki að fanga merkinguna; sjón er einfaldlega sögu ríkari. Í þessari gífurlega vinsælu umfjöllun má sjá þegar stærsta leyndarmál stórleikarans er afhjúpað fyrir fullum sal áhorfenda sem standa á öndinni þegar sannleikurinn verður ljós.

#1 – HVAÐA STELLINGAR ERU BESTAR FYRIR STJÖRNUMERKIÐ ÞITT?

Frá árdögum SYKUR, höfum við meðal annars fært ykkur Kynlíf og stjörnumerkin,Hvaða stjörnumerki passa best og verst saman og Stjörnumerkin og líkamsræktin og virðist fólk fylgja þessum spám í leit sinni að ástinni. Okkur langaði hins vegar að velta aðeins fyrir okkur hegðunarmynstri stjörnumerkjanna í rúminu. Hvaða stelling passar þínu stjörnumerki best? – var sannarlega spurning ársins, því engin umfjöllun komst með tærnar þar sem ofannefnd grein hafði hælana á árinu sem er að líða. 

Ritstjórn þakkar lesendum hjartanlega fyrir samfylgdina á líðandi ári og óskar þess að nýja árið reynist lesendum farsælt, árangursríkt og skemmtilegt í alla staði! 

GLEÐILEGT NÝTT ÁR!

Í þessa galdaformúlu fara tvær vænar sítrónur, sem skornar eru niður í smáa búta og svo vænn skammtur af lífrænu hráhunangi, sem látinn er drjúpa yfir sítrónuna. Sagan hermir að uppskriftin, sem er sáraeinföld, geti bægt kvefi og flensu í fæðingu á brott, því er ekki úr vegi að prófa í það minnsta og sjá hvort kvefið víkur ekki fyrir rótsterkri sítrónu- og hunangsblöndunni. 

Blöndunni er komið fyrir í lítilli krukku með loftþéttu loki (eða smáu Tupperware íláti) og sett inn í íssḱáp, þar sem blandan er látin standa þar til innihaldsefnin renna vel saman og mynda einskonar marmelaði.

Sjóðið vatn í potti, takið sítrónumarmelaðiblönduna fram og bætið vel í bollann. Hrærið saman, munið að njóta og látið kvefið líða á brott!

Celine Dion sló öll vopn úr höndum tónlistarunnenda á nýársdag eins og sjá má á meðfylgjandi myndbandi. Dívan steig á svið í Las Vegas og tók metsölulag Adele, Hello, frammi fyrir troðfullum sal við dynjandi undirtektir.

Ótrúlegt en satt, þetta er ekki í fyrsta sinn sem Celine flytur tónlist Adele, en hún hefur áður tekið lagið Rolliing in the Deep og ekki er því að villast; söngdívurnar tvær eru heitir aðdáendur hverrar annarrar.

Mögnuð byrjun á nýju ári – hér er Celine í Vegas að flytja lag Adele:

Lífsreynslusaga: Helga Árnadóttir, um aðstæður fólks með bráðaofnæmi í Kananda samanborið við á Íslandi.

Fyrir nokkrum árum síðan hafði ég í raun ekki hugmynd um það, þar sem ég þekkti engan sem var með bráðaofnæmi. Ég hafði hvergi fengið fræðslu eða upplýsingar um fæðuofnæmi eða bráðaofnæmi né hafði ég leitað eftir því, þar sem það var mér einfaldlega víðs fjarri. Þess vegna áttaði ég mig ekki á því hvað var að gerast eina kvöldstund þegar líkami kornungrar dóttur minnar hlaut skyndilega mikil útbrot, mætti líkja við að golfkúla hefði blásið upp á enninu á henni og uppköst hófust. Í geðshræringu minni kallaði ég út lækni sem kom eftir að mestu ósköpin höfðu gengið yfir, staldraði stutt við og sagði mér að barnið væri líklegast komið með hlaupabólu. Því miður reyndist sú greining ekki rétt því skömmu síðar fékkst staðfest að barnið væri með bráðaofnæmi fyrir hnetum og kastið rakið til þess. Þannig hefjast kynni okkar fjölskyldunnar af bráðaofnæmi, staðreynd sem upp frá þeirri stundu hefur óumflýjanlega leikið stórt hlutverk í lífi fjölskyldunnar.

Í Kananda með bráðaofnæmi

Í dag bý ég ásamt fjölskyldu minni í Kanada, ýmislegt hafði áhrif á þessa ákvörðun okkar að flytjast tímabundið til Kanada og spilaði þar inn í sú forvitni okkar að kanna að hvaða leyti líf okkar með bráðaofnæminu yrði frábrugðið því sem við máttum venjast heima. Sem móðir barns með lífshættulegt bráðaofnæmi þá verð ég að viðurkenna að þetta ástand dóttur minnar hefur haft töluverð áhrif á daglegt líf okkar fjölskyldunnar. Áhyggjur eru oft viðloðandi, ekki síst ef ég er ekki á staðnum til að gæta hennar og við foreldrarnir gerum náttúrulega allt til að reyna að tryggja það að hún komist ekki í snertingu við hnetur en samt sem áður að líf hennar sé eins eðlilegt og afslappað og kostur er. Líkt og aðrir foreldrar þá er okkur ekkert mikilvægara en öryggi barnanna okkar og fylgir bráðaofnæminu oft mikið álag þar sem maður getur einfaldlega ekki haft stjórn á öllum kringumstæðum þrátt fyrir mikinn vilja. Þó svo að við höfum aðeins búið skamman tíma í Kanada þá finn ég nú þegar mikinn mun á aðstæðum fólks með bráðaofnæmi á Íslandi samanborið við Kanada. Í Kanada virðist fólk þekkja nokkuð vel til bráðaofnæmis sem ég tel að eigi ekki almennt við á Íslandi. Þó nokkuð er um að kanadísk fyrirtæki geri út á að bjóða vörur sem innihalda ekki hnetur, enda ört stækkandi hópur fólks með þetta fæðuofnæmi og aðstandendur sem einnig þurfa að gæta sín. Að sjálfsögðu er ýmislegt gott heima á Íslandi en betur má ef duga skal og með sameiginlegu átaki og vitundarvakningu er hægt að hlúa mun betur að þeim einstaklingum sem kljást við ýmiss konar bráðaofnæmi. Mér hefur fundist það gera mér og mínum gott að upplifa aðrar aðstæður en á Íslandi og vissulega geri ég mér grein fyrir að fámennið á Íslandi spilar inn í en ég tel að það geti einnig verið kostur og langar mig að deila því sem upp kemur í huga minn.

Innihaldslýsingar

Nákvæmar innihaldslýsingar eru mikið grundvallaratriði fyrir fólk með fæðuofnæmi og í Kanada eru innihaldslýsingar til fyrirmyndar og í flestum tilfellum kemur fram á pakkningum ef matvæli gætu hugsanlega innihaldið ofnæmisvalda í snefilmagni. Matvælafyrirtækin eru meðvituð um að verði misbrestur þar á þá þurfa þau að taka alvarlegum afleiðingum. Að geta treyst því sem stendur í innihaldslýsingum er ómetanlegt og það eru sjálfsögð réttindi hvers einstaklings að fá upplýsingar um það sem hann hyggst innbyrða. Ferðir í matvöruverslanir geta einnig oft verið ansi tímafrekar og verslanirnar oft mikill frumskógur, þannig að þá kemur sér afskaplega vel þegar verslanir bjóða viðskiptavinum sínum upp á þá gæðaþjónustu að hafa rekka þar sem einungis er boðið upp á vörur sem innihalda ekki tilgreinda ofnæmisvalda, að auki eru líka margar vörutegundir sérmerktar með Peanut Free merki og leitast ég alltaf við að versla þær vörur. 

Hversdagslegu hlutirnir

Það sem maður á árum áður taldi til hversdagslegra hluta eins og t.d. að skella sér í bakaríið eða á kaffihús hefur flækst ögn með árunum og var í raun ekki í boði fyrir okkur lengur ef litli ofnæmispésinn okkar var með í för, þar sem mikið er unnið með hnetur í íslenskum bakaríum. Í Kanada getum við notið þess sem maður áður fyrr tók sem sjálfsögðum hlut og átt góðar samverustundir á hnetufríu kaffihúsi og notið góðra veitinga án þess að hafa nokkrar áhyggjur. Það sama á við um veitingahús í Kanada en mjög mörg þeirra eru til fyrirmyndar þegar kemur að þjónustu við fólk með sérþarfir. Starfsfólk er almennt vel upplýst um bráðaofnæmi og iðulega kemur yfirþjónn eða kokkur til borðsins … LESA MEIRA:

Alveg er það óþolandi að hugsa til þess hversu auðveldlega einhverjir sofna, meðan aðrir liggja í rúminu og bylta sér þar til sólin fer að gægjast upp fyrir sjóndeildarhringinn. Góður nætursvefn er undirstaða andlegrar heilbrigði og þannig vill auðvitað enginn manneskja ganga vansvefta til móts við nýja vinnuviku.

Hér fara fimm notarlegar uppástungur sem gera meira en ætla mætti í fyrstu. Oft liggur svarið ekki bara í augum uppi, heldur er svo einfalt að erfitt er að koma auga á lausnina:

#1 – Farðu fyrr í rúmið:

Rökrétt, ekki satt? Ótrúlegt þó, það eitt að liggja flötum beinum undir sæng og leggja augun aftur slakar á líkamanum og hvílir lúin bein. Litlu skiptir hvort þú liggur andvaka eða festir svefn; líkaminn þarf á hvíld að halda og oftar en ekki er hægt að sefa líkamann með einfaldri slökunartækni, sem svo aftur veldur því að þú sofnar fyrr en varir. Meðalmanneskjan þarf á 6 – 9 tíma svefni að halda á hverri nóttu, svo þurfir þú að vakna klukkan 7 að morgni, skaltu telja u.þ.b. 8 klukkutíma afturábak og fara hjúfra þig upp að koddanum þegar sá tími rennur upp …

#2 – Skapaðu kjöraðstæður að kvöldi …

Kenndu líkamanum ákveðnar kvöldvenjur sem ekki tengjast athöfnum daglega lífsins. Slökktu á sjónvarpinu, leggðu tölvuna frá þér, stilltu vekjaraklukkuna og dragðu úr ljósmagninu. Þannig sendir þú líkamanum þau skilaboð að nú sé dagur að kvöldi kominn. Það sama gildir þegar þú vaknar; stattu upp úr rúminu og gakktu út úr svefnherberginu um leið og þú opnar augun. Teygðu þig strax í farsímann, smeygðu þér í inniskó og taktu morgungeispann frammi í eldhúsi.

#3 – Slakaðu á með öllum ráðum:

Heitt bað að kvöldi, hugleiðsla rétt áður en farið er inn í rúm, róandi tónlist og rjúkandi heitt te. Fylgdu þessari rútínu á hverju kvöldi og mundu, að þú ert að endurstilla líkamsklukkuna. Fróðir segja að líkaminn læri að fylgja nýjum venjum, ef sömu rútínu er viðhaldið á hverjum degi í þrjár vikur. Ef þér hættir til að verða andvaka, mundu þá að þú ert að endurstilla líkamsklukkuna; sýndu því örlitla þolinmæði.

#4 – Leggðu frá þér skjáinn klukkutíma fyrir svefn:

Skjárinn er versti óvinur þeirra sem þurfa nauðsynlega á nærandi nætursvefni að halda. Skjábirtan frá farsímanum eða spjaldtölvunni getur jafnvel dregið úr melatónínframleiðslu líkamans. Kveiktu frekar á náttljósi og taktu upp ágæta bók u.þ.b. klukkutima áður en ætlunin er að leggja aftur augun.  

#5 – Viðhaltu rútínunni á hverju kvöldi:

Auðvitað viltu sofa út um helgar og hangir lengur fram á sófann á laugardagskvöldum. En ágætt er að hafa í huga að uppástungurnar hér að ofan eiga við háttavenjur um virka daga. Það tekur líkamann tíma að aðlagast nýjum venjum, sérstaklega að nýyfirstöðnum hátiðum. Gerðu háttatímann eins aðlaðandi og hægt er. Skiptu reglulega á rúminu, festu kaup á mjúkum náttfötum og komdu litlum leslampa fyrir á náttborðinu. Gluggaðu í jólabækurnar, þær sem leyndust í einhverjum pakkanum – ekki berja höfðinu við stein þó þú hafir legið andvaka í einhvern tíma og haltu uppteknum hætti í einhverjar vikur.

Vittu til, oftast er svarið fólgið í einföldum breytingum á daglegum venjum og markmiðin hér að ofan eru vel þess virði að fylgja, enda er góður nætursvefn gulls ígildi.

Í mörg ár núna, hef ég sleppt því að setja mér áramótaheit. Ég var búin að valda sjálfri mér vonbrigðum hvað eftir annað með því að gleyma öllum heitum fyrir 10. janúar ár hvert og allt féll í sama gamla farið. Það var þá orðinn skárri kostur að hafa áramótaheitið „að setja mér ekki áramótaheit”.

En þegar maður hættir að reyna, verða vonbrigðin enn verri. Til að þroskast, læra á sjálfan sig og ná lengra í lífi sínu í dag enn í gær, verður maður að setja sér markmið. Skora á sjálfan sig. Sjá fyrir sér útkomuna án þess að flækja fæturna í hugsuninni að leiðinni þangað. Og stíga fyrsta skrefið.

Það að ætla sér mikið og margt er ekkert slæmt. Það munu ekki allir ná öllum sínum markmiðum og það er allt í fína lagi að sum áramótaheitin séu þau sömu og í fyrra og kannski hittiðfyrra líka. Stundum eru sum markmiðin svo há að það tekur lengri tíma að ná þeim enn öðrum.

Ekki berja sjálfa/n þig fyrir að hafa ekki náð alla leið á síðasta ári. Settu frekar sterkari sannfæringu í heit þín þetta árið og þrammaðu af stað.

Nú er komið árið 2016 og ég er alveg að verða fullorðin, þannig að ég hef tekið þá ákvörðun að dusta hnausþykkt ryklagið af nokkrum gömlum ásetningum, eins og búddistar kalla markmiðasetningu sína og heit.

Ég ætla hins vegar ekki í þetta skiptið að romsa upp einhver tilviljanakennd sjálfsloforð sem eru í tísku. Ég ætla að setjast niður með blað og penna, hugsa og hugleiða og finna það raunverulega út hvað það er sem mig langar til að áorka í lífinu þetta árið.

Ásetningur er örlítið öðruvísi enn venjulegt áramótaheit. Það er í rauninni mjög djúpstætt loforð og staðföst ákvörðun og með þessu er maður búinn að setja ferlið í gang sem leiðir síðan til þess að takmarkinu verður náð.

Hvað ég mun finna út veit ég ekki enn og enn síður veit ég hvort ég muni gera alla ásetninga mína opinbera fyrir fjölskyldu og vinum. Þrátt fyrir að ég telji það öllum hollt að segja þá upphátt. Bæði til að heyra ákvörðun sína með eigin eyrum og einnig til að gefa ekki sjálfum sér þann lúxuskost að svindla á sér bara vegna þess að enginn veit.

Ég held að þar hafi hundurinn legið grafinn hjá sjálfri mér hér á árum áður. Það er svo auðvelt að svindla á sjálfum sér þegar enginn annar veit áramótaheitin sem maður setti sér. Og þegar maður skilur eftir smugu, eins og til að mynda, að setja sér heit um að hætta að reykja en segja engum frá því þar sem þú gætir mögulega sprungið á limminu, er einfaldlega ekki heit eða ásetningur.

En þar sem þessi pistill er í sjálfu sér djúpar og einlægar hugleiðingar mínar, tek ég ákvarðanir með hverju pikki.

Og hér hafið þið fyrsta áramótaheitið mitt:

Þegar ég hef samið ásetninga mína, ætla ég að gera þá opinbera fyrir vinum og fjölskyldu. Þannig hef ég saumað fyrir smuguna sem ég skildi alltaf eftir opna hér áður fyrr.

Stundum vinnst einfaldlega enginn tími til að fara í ræktina. Einhverjir eru á sífelldum þönum allan daginn, aðrir hafa hreinlega ekki efni á mánaðarkorti og svo eru það þeir sem hafa einfaldlega enga löngun til að hamast í tækjasal til þess eins að brenna kaloríum.

En náttúran er dásamleg úr garði gerð og þannig fela fjölmörg dagleg verkefni okkar í sér líkamlega áreynslu og það jafnvel án þess að við höfum hugmynd um að líkaminn sé að erfiða; allt frá því að bera innkaupapoka upp tröppur til þess að hlæja vel og innilega. Jafnvel það eitt að ráða erfiða krossgátu eða streða við próftöku getur brennt hitaeiningum.

Sé ofangreint haft í huga, er nær ótrúlegt að hugsa til þess hversu nýtilegar annir hversdagsins í raun eru. Þó verður samtímis að hafa hugfast að fólk sem stundar kyrrsetuvinnu getur ekki treyst á hláturmilda kaloríubrennslu né heldur reiknað með því að klukkutímasprettur bæti upp fyrir 6 klukkutíma setu á stól. En safnast þó þegar saman kemur og hér fara þær, tíu skemmtilegustu leiðirnar til að brenna kaloríum án þess að fara í ræktina:  

.

#1 – HLÆÐU MEIRA!

Ekki bara er hláturinn besta meðalið, heldur er langt og hressilegt hláturskast albesta leiðin til að brenna fleiri kaloríum án teljandi áreynslu. Bara það eitt að hlæja að fyndnum uppstandara í litlar 15 mínútur getur hjálpað þér að brenna milli 10 og 40 kaloríum. Að ekki sé minnst á að hláturinn leysir vellíðunarboðefnið serótónín úr læðingi, sem einmitt dregur úr matarlyst.

#2 – DILLAÐU ÞÉR!

Hvort sem þú elskar að dansa við dynjandi diskó eða þolir ekki meiri áreynslu en einfaldan vangadans bak við luktar dyr, er óumdeilanlegt að dans er frábær líkamsrækt. Bara það eitt að hlaupa með vinkonum út á dansgólfið og taka hressilega á því við skemmtilegan danstakt getur brennt allt að 450 til 600 kaloríum, allt eftir því hversu hversu líflegur dansinn er. Bara það eitt að dilla sér við tónfall á skemmtilegum tónleikum getur brennt allt að 250 kaloríum á klukkustund, sem jafngildir hitaeiningafjölda í litlum hamborgara!

#3 – SLEPPTU AF ÞÉR BEISLINU Í RÚMINU:

Kynlífsiðkun og rúmleikir eru ein besta líkamsrækt sem hægt er að hugsa sér, ef undan eru talin hressileg átök í æfingasalnum. Ástarleikir sem spanna að meðaltali hálftíma geta þannig brennt allt að 160 kaloríum. Sé forleikur reiknaður inn í dæmið bætast aðrar 55 kaloríur við …

#4 – VERSLAÐU AF ÞÉR KÍLÓIN:

Já, í bókstaflegri merkingu. Innkaup geta verið grennandi. Bara það eitt að ganga milli verslana, hlaupa inn í mátunarklefa, burðast með innkaupapoka og renna fingrunum eftir rekkunum getur brennt allt að 180 kaloríum á klukkustund. Matvælainnkaup sem standa yfir í heilan klukkutíma, tilheyrandi pokaburður og brölt getur brennt allt að 260 kaloríum á klukkustund. Gættu þess bara að narta ekki í millimál meðan þú verslar inn í matinn … því þá ertu að bæta kaloríum ofan á þær sem þú ert að brenna.

#5 – STATTU BEINNI Í BAKI:

Konur og karlar í yfirþyngd ættu að prófa að standa upprétt við vinnu sína alltaf þegar því er komið við, sé ætlunin að missa nokkur kíló. Líkaminn brennir að meðaltali 2 kaloríum til viðbótar á mínútu í standandi stöðu og þannig getur það eitt að standa við vinnu sína á hverjum degi leitt til þess að líkaminn missir 7 kíló á ársgrundvelli, ef hollt mataræði verður ofan á. Fólk í skrifstofuvinnu ætti líka að prófa að taka stutta göngutúra um skrifstofuna á hverjum degi, sem örvar efnaskiptin.

#6 – SYNGDU HÁSTÖFUM!

Já! Ekki vera hrædd við að syngja af öllum kröftum með uppáhaldslaginu þínu, alla vega í bílnum eða heima við … þar sem þú getur verið örugg/ur um að valda ekki almennu ónæði. Það eitt að syngja hástöfum brennir að meðaltali 136 kaloríum á klukkustund og ekki er verra ef þú tekur danssporið með!

#7 – ELDAÐU HEIMA:

Einmitt. Veldu holl hráefni og sneiddu hjá fituríkum afurðum. Það er kannski einfaldara að kippa upp skyndibita á leiðinni heim – en það eitt að standa og elda sjálf/ur heimatilbúinn mat í eldhúsinu í hálftíma brennir allt að 100 kaloríum.  Hugsaðu þér bara!

#8 – TAKTU FAGNANDI MÓT VETRI!

Þetta hljómar undarlega, en rannsóknir hafa sýnt fram á að það eitt að skjálfa örlítið í kulda brennir kaloríum og hindrar líkamann í því að safna fitu. Nýleg rannsókn, sem að vísu var smá í sniðum, sýndi þannig fram á að einstaklingar sem eyddu deginum í 15 gráðu hita, brenndu að meðaltali 430 fleiri kaloríum en þeir sem eyddu deginum í 27 stiga hita. Svo taktu fagnandi á móti vetri og hafðu hugfast að vægur kuldahrollur getur örvað efnaskiptin!

#9 – SKELLTU ÞÉR Í HÚSVERKIN:

Já, þetta er ekkert ægilega spennandi en skúringar og uppvask geta falið í sér ágæta hreyfingu. Þannig brennir meðalkarlinn um 110 kaloríum við það eitt að ryksuga og skúra gólfin á hálftíma, meðan konur að meðaltali brenna um 95 kaloríum við sömu verk.

#10 – EINBEITTU ÞÉR AF ALEFLI:

Heilabrot geta örvað efnaskiptin og það eitt að takast á við erfitt verkefni eða próf, getur brennt allt að 1.5 kaloríum á mínútu. Heilinn er sannkölluð orkusuga samanborið við öll önnur líffæri og krefst þannig u.þ.b. 20% alls orkuforða sem líkaminn býður upp á hvern einasta dag. Þegar þú einbeitir þér því af alefli, kallar heilinn eftir enn meiri orku en venjulega og þannig fer brennslan á flug. Svo það er hollt að hugsa eftir allt saman!

Heimild // CNN

Svo nú á að taka á ræktinni? Veganúar blómstrar, hátíðir að baki og einhverjir búnir að festa kaup einkaþjálfun í mánuð. Það er eitthvað svo yndislegt að hefja nýtt ár með heilsuátak í huga. En þó einhverjir segi að frábært sé að æfa á tóman maga, eru aðrir einfaldlega þannig úr garði gerðir að tilhugsunin ein er skelfileg.

Suma fæðu er kjörið að innbyrða rétt áður en farið er á æfingu, rétt eins og til að fylla á orkutank líkamans. Bestu fyrir-æfingu-drykkirnir eru enda stútfullir af próteini, góðum kolvetnum og heilnæmum fitusýrum. Innihaldsefni á borð við þessi hjálpa líkamanum að viðhalda orku og seðja sárasta hungrið um leið.

Uppskriftin hér að neðan nægir fyrir einn, en hægur leikur er að smella í þeyting fyrir tvo með því að tvöfalda einfaldlega uppskriftina. Sjálf afhýði ég og kjarnhreinsa epli, sem eiga að fara í blandarann – ríf svo niður með rifjárni og set í blandarakönnuna, en aðrir láta sér að góðu verða að kjarnhreinsa og afhýða og skera í litla búta.

Auðvitað má svo skera niður epli í litla búta og frysta; alla ávexti og reyndar grænmeti líka má frysta og hér kemur fróðleiksmoli dagsins – fryst spínat (og grænkál) inniheldur meira magn af járni og magnesíum en fersk lauf. Erfitt er að segja til um af hverju, en ekki ljúga sérfræðingarnir. Ef þú ertU að glíma við lágt járnmagn og þolir illa að taka járn í töfluformi, skaltu því fyrir alla muni kaupa og skola fersk spínatblöð; stinga í frysti og þeyta í einn grænan í upphafi hvers dags. Það skotvirkar!

Í þetta yndi, sem er tilvalið í drykkjarbrúsann fyrir æfingu fer hins vegar epli, banani, hráir hafrar, kókosolía og að sjálfsögðu spínat (eða grænt kál að eigin vali) og við á ritstjórn leggjum eindregið til að frysta grænu laufin, því þannig bindur þú bætiefnin og eykur enn á næringarinnihaldið!

U P P S K R I F T:

1 bolli af spínati (eða grænu káli að eigin vali)

1 bolli ósæt möndlumjólk

½ banani (afhýddur að sjálfsögðu og má vera frosinn)

3 vænar matskeiðar (glútenlaust) haframjöl

1 matskeið (lífræn) kókosolía

½ tsk fínmalaður kanell

*Byrjið alltaf á því að: þeyta spínat og vökva saman og blandið vel þar til drykkurinn er orðinn þéttur og áferðarfallegur. Bætið svo ávöxtunum út í blandarann, tilvalið er að setja frosna og smátt skorna ávexti út í blandarann til að kæla drykkinn og auka á svalatilfinninguna.

Smellið á drykkjarbrúsa og njótið áður en tekist er á við alvöru lífsins í ræktinni!

Lana Del Rey óttast um líf sitt og hefur fulla ástæðu til að skelfast, en söngkonan hefur farið fram á nálgunarbann gegn tveimur rússneskum konum sem hafa setið um djassdívuna sorgmæddu undanfarna mánuði og haft í frammi vægast sagt ógnandi tilburði.

Þetta kemur fram á slúðurmiðlinum TMZ, en Lana segir tvíeykið ósvifna, sem heita Nataliia Krinitsyna og Luliia Vladimirovna Pozdina, hafa elt sig á röndum undanfarna mánuði og hrópað að henni ókvæðisorðum á almannafæri. Þá hafa stúlkurnar tvær skrifað söngkonunni fjölmörg hótunarbréf þar sem ýmist má lesa berorða dagdrauma um ofbeldi eða vangaveltur um sjálfsmorð.

Svo langt gengu eltihrellirnir tveir, að Lana neyddist til að flytja en stúlkurnar höfðu uppi á nýja heimilisfanginu, hreiðruðu um sig í nágrenninu þar sem þær höfðust við næturlangt í svefnpokum og öskruðu ókvæðisorð að skelfingu lostinni söngkonunni þegar myrkva tók á kvöldin.

Terrence Loves You: Melódramatísk Lana Del Rey með tvær nýjar smáskífur

Lana hefur nú loks fengið nálgunarbanni framgengt sem skipar fyrir um að friðarspillirnir haldi sig í 100 metra fjarlægð að lágmarki og er vonandi að úrskurður dómara nægi til að tryggja Lönu annars sjálfsagt næði. Þetta mun þó ekki í fyrsta sinn sem söngdísin þarf að draga geðsjúkum aðdáendum fremur óvægin mörk. Þannig braust 19 ára gamall karlmaður að nafni Zachary Bentol Self inn á heimili Lönu í desember, en sá hafði lagt á sig ferðalag yfir þver og endilöng Bandaríkin til þess eins að geta hreiðrað um sig í bílskúr söngkonunnar.  

Talið er að Self hafi læðst inn í bílskúrinn meðan iðnaðarmenn voru að störfum, en endurbætur á húsinu stóðu yfir. Lana var hins vegar ekki heima þegar innbrotið átti sér stað og hefur Self verið ákærður fyrir ofsóknir og grófa tilraun til innbrots.

Það er augljóslega ekki tekið út með sældinni að tilheyra þeim ríku og frægu.

TMZ greindi frá